Azərbaycan Yazıçılar Birliyinin Tərcümə Mərkəzinin yeni direktoru, şair Səlim Babullaoğlu yazıçı Afaq Məsudla guya aralarında olan narazıçılıq barədə açıqlama verdi.

ANS-in məlumatına görə, Səlim Babullaoğlu qeyd etdi ki, yayılan informasiya düzgün deyil, Afaq xanımla görüşməmişəm, aramızda da heç bir münaqişə yoxdur. 

“Binanın ayrılması Nazirlər Kabinetinin ixtiyarındadır. Onlar necə qərar verəcəklərsə, elə də olacaq”, - deyə AYB-nin Tərcümə Mərkəzinin yeni direktoru bildirdi. 

Qeyd edək ki, mətbuatda Afaq Məsudun bu yaxınlarda Nazirlər Kabineti yanında yaradılmış Tərcümə qurumuna rəhbər təyin olunsa da əvvəlki iş yerini təhvil-təslim etmək istəmədiyi yazılıb.



Şair Səlim Babullaoğlu bu haqda fikirlərini belə bölüşdürdü: “O binanın taleyi Nazirlər Kabinetinin yurisdiksiyasındadır. O bina bu iki qurumdan birinə veriləcək. Digəri isə başqa binaya köçəcək”.

Səlim Babullaoğlu hazırda AYB-də əvvəlki otağında oturduğunu dedi.



Yazıçı Afaq Məsud da bu informasiyanın yalan olduğunu söylədi: “Səlim Babullaoğlu bura gəlməyib, nə də bura gəlmək üçün müraciət edib. Biz oturub öz işimizlə məşğul oluruq. Binanın hansı quruma verilməsi məsələsi ilə Nazirlər Kabineti məşğul olur”.

Xatırladaq ki, Nazirlər Kabineti yanında Tərcümə Mərkəzi mayın 16-da yaradılıb və Afaq Məsud bu quruma sədr təyin edilib.