“Ermənistanın keçmiş prezidentləri Robert Köçəryan və Serj Sarkisyanın dövründə ölkəyə milyard dollarlıq silah gətirilmişdi”.

Bunu Ermənistanın keçmiş müdafiə naziri Seyran Ohanyan deyib.

Onun sözlərinə görə, Rusiya ilə ilk hərbi-texniki əməkdaşlıqla bağlı müqavilə Robert Köçəryanın dövründə bağlanıb:

“Onun əsasında bura 3 ədəd S-300 sistemi gətirilmişdi, Moskva 2 ədəd İl-76 təyyarəsi hədiyyə etmişdi. Daha bir təyyarə Sarkisyanın dövründə alındı. Onların ümumi dəyəri hakim partiyadan olan bəzi deputatların gətirdiyi rəqəmlərdən qat-qat yüksəkdir. Təxminən bir milyard dollara çatır”.

Ohanyan, həmçinin qeyd edib ki, müdafiə naziri olduğu vaxt Ermənistana silah daşımaq üçün Rusiyadan təxminən 1300 təyyarə uçuşu olub:

“Xüsusilə S-300, “Toçka-U”, “İsgəndər”in Ermənistana silah gətirilməsi davam edirdi. Bu daşınmalar 2018-ci ildən sonra baş verənlərlə müqayisə oluna bilməz”.

Keçmiş müdafiə naziri vurğulayıb ki, 2016-cı ildən sonra xeyli sayda PUA alınması planlaşdırılırdı, amma layihə həyata keçirilmədi.