Dünyanın bir çox ölkələrində olan məzarlıqların giriş hissəsində şəhidlərin dəfn olunması üçün xüsusi yerlər ayrılıb. Həmin yerlərdə ancaq şəhidlər dəfn olunur. Buna misal olaraq, qonşu Türkiyəni göstərmək olar.

Bəs Azərbaycanda niyə məzarlıqlarda şəhidlərin dəfn olunması üçün xüsusi yerlər ayrılmır?

Məsələ ilə bağlı Milli Məclisin İctimai birliklər və dini qurumlar komitəsinin sədri, Yeni Azərbaycan Partiyası (YAP) icra katibinin müavini Siyavuş Novruzov Modern.az-a açıqlama verib.

Komitə sədri bildirib ki, qanunvericilikdə bununla bağlı müddəalar var.

“Bununla bağlı “Şəhid adının əbədiləşdirilməsi haqqında” qanun var. Həmin qanunda şəhid abidələrinin, məzarlarının hansı formada, necə və harada olması göstərilib. Bunlar da bilavasitə olaraq, müvaffiq icra hakimiyyəti orqanına, Müdafiə Nazirliyinə həvalə olunub”.

S.Novruzov deyib ki, nümunəvi qəbiristanlıqlarla bağlı qanun layihəsi hazırlanır.

“Həmin qanunda nümunəvi qəbiristanlıqların yaradılması və idarə olunması da öz əksini tapıb. Bu qanunda müəyyən istisnalar da var. Şəhid məzarları digərlərindən fərqlənməyəcək, amma seçiləcək. Gələcəkdə həmin qanun qəbul olunsa, ayrı-seçkilik də olmayacaq. 

Son zamanlar torpaq, vətən uğrunda şəhid olan şəxsin məzarı onun doğulduğu bölgədə, ata-babalarının dəfn olunduğu qəbiristanlıqda yerləşir. Keçmişdə şəhid olan şəxsin nəşini Bakıya gətirirdilər.  Şəhidlər Xiyabanında dəfn edirdilər.  Daha sonra isə rayon və şəhərlərin mərkəzinə gətirib, orada dəfn edirdilər. Onlar harada dəfn olunmağından asılı olmayaq, şəhiddirlər. Həmin şəxslərin adları da şəhidlərin siyahısındadır. O, kənddə də, rayonda da, şəhərdə də dəfn olunsa, yenə də şəhid statusunu qoruyub saxlayır. O baxımdan da belə hesab edirəm ki, şəhid məzarları digərlərindən fərqlənməlidir. Doğulduğu və böyüdüyü yerdə dəfn olunmalıdır”.  

Deputat hesab edir ki, məzarlıqların giriş hissəsində şəhidlərin dəfn olunması üçün xüsusi yerlər ayrılmasını heç kim nəzərdə tuta bilməz.

“Çünki ola bilər ki, sabah bizim şəhidimiz olmadı. Mən həmin yerlərin nəzərdə tutulmasını məqsədə uyğun hesab etmirəm. Əgər şəhidimiz olacaqsa, onun dəfn olunması üçün yer tapmaq və ya müəyyən etmək mümkündür”.